Madaxweynaha Jamhuuriyadda Federaalka Soomaaliya, Mudane Xasan Sheekh Maxamuud, ayaa la kulmay xubno ka tirsan hoggaanka mucaaradka, si loo bilaabo wareeg cusub oo wadahadal ah oo lagu doonayo in lagu xalliyo khilaafaadka siyaasadeed ee u dhexeeya dowladda dhexe iyo qaar ka mid ah dowlad-goboleedyada.
Kulanka ayaa ka dhacay xarunta Madaxtooyada Villa Soomaaliya, wuxuuna qayb ka yahay dadaallo dhanka is-afgaradka ah oo lagu wajahayo xaaladda kala qeybsanaanta siyaasadeed ee mararka qaar curyaamisa howlaha dowladda.
Madaxweyne Xasan Sheekh ayaa sheegay in “wadahadalku yahay jidka keliya ee horumar lagu gaari karo”, isagoo intaa ku daray in miiska wada-xaajoodka uu u furan yahay dhammaan siyaasiyiinta Soomaaliyeed – mucaarad iyo muxaafidba.
Qodobada laga wada hadlay waxaa kamid ahaa:
Hirgelinta doorasho qof iyo cod ah sannadka 2026
Kala qeybsanaanta dowlad-goboleedyada qaarkood
Dib-u-eegista dastuurka kumeel-gaarka ah
Xoojinta wada shaqaynta hay’adaha dawladda
Kulankan ayaa imanaya xilli ay jirto cabasho xooggan oo ka timid dowlad-goboleedyada Puntland iyo Jubaland, kuwaasoo diiday qaar ka mid ah isbeddellada dastuuriga ah ee dhowaan la ansixiyay. Inkasta oo aysan kulanka ka qaybgelin madaxdaas, haddana dowladda dhexe ayaa sheegtay in ay rajeynayso in wajiyada dambe ay iyaguna ka mid noqdaan.
Diblomaasiyiin iyo ururro caalami ah sida Midowga Afrika iyo IGAD ayaa soo dhaweeyay kulanka, iyagoo ku baaqay in la sii xoojiyo wadahadalka qaran ee loo dhan yahay.
